Katibas Song :Peranak menua pesisir suah dichiping

KUCHING: Projek Impian Sarawak DAP udah mujur bejalaika projek bekal ai graviti ungkup peranak Rh Timban Emperan Munti, Sungai Iran Song kena 28 November 2015.

Projek nya dipenyadika Mandal Chairman DAP Sarawak ke mega Kaban Kunsil Nengeri  (ADUN) Pelawan, David Wong Kee Woan.

Dikemujur nengah pengawa beripai entara peranak ke diau ngelingi begulai enggau raban ari DAP berengkah 23 nyentuk 27 November 2015, sida nembuka pengawa nyambung paip pemanjai 1.5 Km.

Wong ba jaku rambau bejadika projek madah DAP deka nyendiaka infrastruktur baka bekal ai, lekterik sereta jalai ungkup peranak menua pesisir.

“DAP ngutuk tusun pengawa perintah Barisan Nasional (BN) ti bechiping lebuh magi pemansang ngagai peranak menua pesisir ke alai semina sida ke nyukung BN aja diberi projek mit menua pesisir (MRP).

“Mayuh kes udah diripot ke alai perintah nengeri ngukum peranak menua pesisir nengah chara enda meri MRP sereta mega ngetuka pangku pengawa sekeda tuai rumah,” ku iya.

Beambika chunto Rh Timban di Sg Iran, Song, Wong nambah sida sekayu rumah panjai 14 pintu udah enda nerima bekal ai beresi kenyau 15 taun ke udah.

Ku iya, peranak Rh Timban udah suah minta disedia bekal ai dalam timpuh nya ke alai sebuah rumah panjai besemak enggau nya, Rh Chirry Emperan Munti udah diberi bekal ai nengah sistem graviti ba 2014.

Meretika pemar nya, sida serumah ngenataika sebana ngagai Protem Chairman DAP Katibas, Paren anak Nyawi.

Pekara nya dibai Paren ngagai DAP lalu disetuju dibantu nengah Projek Impian Sarawak DAP.

Ku Paren, nengah saup ari Tim Impian Sarawak enggau peranak menua nya empu ba pengawa beripai, projek mujur tembu dalam timpuh 3 bulan nengah belanja RM15,000.

“Gaya politik BN ti nyeliah sekeda orang ngasaika hak ba pekara pemansang tauka projek sigi salah lalu enda nitihka atur demokrasi.

“Kitai DAP keran ngubah runding ke bansa nya lalu pechaya ubah deka nyadi ba kandang menua pesisir di nengeri tu,” ku iya.

Read more: http://www.theborneopost.com/2015/12/04/peranak-menua-pesisir-suah-dichiping/#ixzz3tJjErduU