Jako Peransang ngagai bala raban DAYAK..

#JAKO PERANSANG BALA RABAN DAYAK#Manah amai jako perangsang tuk di "SHARE" bala kaban .aku Re"SHARE" ba ditok awakka nyadi peransang bala mayuh:-

Sesintung pan batu telu ketupung enggi kitai enti enda di anjung, nadai meh nya tau meri untung menang bebeli.
Segantang batu lua kenyalang enggi kitai enti enda ditandang, nadai meh tau meri tebilang pansut pemerani.
Se engkabai pan batu lua beragai enggi kitai enti enda di anjung bumai, nadai meh nya tau ngasuh bulih padi.
Baka merau, orang udah datai di pala liu, tang kitai agi ngeredayau di kaki rantau.
Baka bejalai, orang udah datai di rapi tatai, tang kitai agi dedayau di rapi pulau.
Baka nunu, enggi orang udah angus ngamau, tang enggi kitai reban pan empai mansau.
Ni kitai enda tinggal sintau kemarau langkang?
Nyangka kitai Dayak tu nadai 'Tuai' ke amat amat tau di kumbai tuai......
Ke berani tan baka Ningkan, Stephen Kalong.
Ke berani mejah atur ti salah baka Tun Jugah apai Irong.
Ke berani bejako baka Koh, tuai dulu Rekaya Temenggong.
Ke berani pintar baka Badar ke bejuluk Reba Nyegang Nanga Keliung.
Ke berani amat baka Libau Rentap apai Tambong.
Ke berani kempang baka Balang Balai Nyabong.
Ke berani changka baka Rekaya Dana laki Tiong.
Kitai ke tuai patut ngemeran ke
Adat berumah betuntung temetung
Adat bumai betangkup punjung
Adat napang bekunsi rintung
Adat beban saum beliung
Adat berikan bedua  untung.
Pemanah jungkung, sida betembung tumbuh besendi.
Pemanah bintang, sida begentilang tumbuh bekecheli.
Pemanah semut, sida besaup berangkut beribit bai.
Pemanah ikan, sida beraban sereta ngaban, ngempas di kerangan ulu ai.
Tang penyai kitai mensia, udu rangka raya sapu semua enggai beberi makai nengali....
Bejalai ke pengawa nyadi Tuai sigi ukai senang.
Laban sungai enda tau nadai wong,
Kayu enda tau nadai bungkong.
Sungai enda tau nadai gerugu,
Betong enda tau nadai buku.
Nya alai, bala kitak tau ke kitai ke tuai
Sapa ke enggai di ansak
Sapa ke lembau di pajak
Sapa ke leso di pasak
Sapa ke tindok di gerak
Sapa ke lubah di rak.
Sida ke laboh di katung
Sida ke rebah di tanggung
Sida ke tumbang di  sukung
Sida ke tinggal di  anjung
Sida ke rapas di surung
Sida ke tengelam di  pelepung
Sida ke rarat di apung.
Iya ke baruh di panggal
Iya ke meranggang di sedal
Iya ke singit di tekal
Iya ke tiris di pakal
Iya ke panjai di tikal
Iya ke belung di kedar
Iya ke repa di papal
Ngambi ke kitai Dayak, sama bebatak nunda anak pandung jelayan. Sama be irit baka tarit tali unan.
Ngiri lalu ngesuh
Matan lalu ngambuh
Nempa lalu nyepuh.
Anembiak kitai Dayak,
Ke majak rapa di peda mata menchenung
Ke majak lemi di pelepi tulang patung
Ke majak ikak di kechiak arung beradung
Ke majak penat di rakat tamping perempung
Ke majak tepejuh jauh ke dalam kampung
Ke majak tesat kena serangkap miga bekurung.
Ngambi sida iya enda baka rusa
Nyau terunda runda makai buah empasa
Enda nemu diri kena sintak amba jarin utan
Ngambi sida iya enda baka kijang
Nyau rindang makai buah jabang
Enda nemu diri kena tebak jerungkang tanam.
Enggai ke sida iya baka pelanduk
Udu gauk nyinuk makai buah abuk
Enda nemu diri sintak panjuj, be umpan ke buah buan.
Utai manah kitai begerah
Utai nguntung kitai begempung
Jalai senang kitai beperansang
Jalai nyamai kitai bekumbai
Singkang ngena kitai betunda
Singkang ngidup kitai besaup
Biar pengelandik di gembar penemu
Biar ulah manah intu
Biar ati tuchi chiru
Biar jako siru menuku
Biar pengawa bisi bunsu
Alai betumpu, beruntu nyingkang
Meruan jelan, meruan peduman
Tawak ngakas mutai di randang